شعر: محمد عبد القادر وضياء غنيم يكتبان

- طب ايه مش كله تمام؟
- مش ظاهر ليه عالشاشة؟

* موجود والله يا صاحبي
* بس انت عنيك غشاشة

- طمنى عليك الاول وازى الدنيا وحالك؟
* ربك عالم بالدنيا.. ماشيين ف طريق مش سالك

- قادر ربك يعدِلها هو العالم بالحال
* عارف والله يا صاحبي.. لكن فوق ضهري جبال
- ماتشيلش الهم يا صاحبي خليها علي الله يا خال

* راضيين بقضاءه وقدره.. عارفين إننا ماشيين
* لكن دنيانا يا صاحبي ماشية معانا بوشين
* تدينا الوش العاطل .. والخير تديه للشين
* بنحاول ننسى يوماتي .. ف بننسى إننا عايشين

- اضحك عالدنيا وعيشها واعمل زى المجانين
- الناس فاكرينهم لسعوا لكن هما العاقليين
-الدنيا حكايه وسيما خدناها شمال ويمين
- خلينا نعيشها ويمكن تضحك وتفك يومين

* احنا اللي عملنا سيناريو وكتبنا كلام ممنوع
* أفلامنا تعلي الهابط ونموت احنا من الجوع

* خلينا نشوف اخرتها.. مش يمكن تبقى براح؟!
* والفرح يزور حتتنا.. والغم نقول اهو راح
- اضحك للدنيا وغيظها عللي دماغ ترتاح

* أنا جعت ونفسي ف أكلة .. ما تقوم تعمل بيضتين
* شوفلنا لكلامنا دة قفلة .. أحسن ما نبات مساجين
- ابو ام الناس والدنيا ابو ام البنى ادمين
- هو احنا الخوف يعرفنا ماترد عليه يا حسين