شعر :: مشنوق البرتقان - سعد النجار

محدفش البحر لأخر ورقة

و لا فضّا عروقه

من كل البشر اللى بيسعوا ف جوفها

شال البيت ف الشنطة

و رحل

ويا بياعين الخُضار

للشمس

لو شفتوه

بيمر فوق السور

ما تخافوش

مش بيهرب

و لا ناوى يكسّره

من كتر ذل المشقة

كان نفسه يعيش جواه

كان نفسه يكون عفريت

بيقيد الليل

و بيطفى الفوانيس

كان نفسه يلم الترابيس

أو يبكى حجارة

لجل ما يبقى الكون مسجون ف خدوده

كل اللى دخلوا ف الوريد

فرادى

خرجوا الليلادى

كورس

هو الوحيد

لما بكا

غرقت شوارع

متهمشة

هو الوحيد

فك قلبه من مكانه

لجل ما يقعّد عجوزة

المسنة

قلبها فايح بريحة برتقان

ادخلوا

عروقى شوارع بتنهش

كل اللى سكنوها

بيوتها بتسكن

ساكنيها

ادخلوا

العروق

مخلوقة للسكن

و ريحة عرق الشقا

بيشهق الورد

و الغصن اتلوا

كل الجذوع متيتّمة

جايز شافوها

بتفك نفسها

و تهرب

كل الجذوع هربت

مفيش و لا جذع باقى لمشنقة