إزعاج :: شعر :: قادر تعيش - ضياء غنيم

مع إن عودك منحني مبيترويش

قادر تعيش

قادر تقول والشعر جواك انتصر

ليه انكسر

قدام حاجات مبتتحكيش

قدام قصيدة بتبتديها بألف معنى متنتهيش

قدام حاجات ..

ممنوعة لعيون البشر

قدام صور..

ترفض براويز الحياة

عيّل ما بين صوته وصداه

خيطه الضعيف

وبخيط ضعيف

يوصل مابين تِوَك النهار ..

وضفاير الليل الكفيف

خيطه الضعيف

ماقدرش إنه يحتمل حمل الزمن

الناس قالولي الشعر مش حزن وشجن

الشعر معناه الجمال

الشعر أفراح الوطن

عايزينّي أقول ما احلى الورود

عايزبني أقول الحب شئ مالهوش حدود

عايزيني أكون قاضي السعادة

والقصيدة من الشهود

وانا مش هقول غير اللى حاسّة

مش مهم الناس يحسّوا

دا الجواب عندي ف سؤال

والسؤال مليان ردود

السؤال .....

الغصن لو مات واندفن

يقدر على طرح الورود ؟؟؟!!

ف ازاى أقول ما احلى الورود

وازاى أقول الحب شئ مالهوش حدود

وازاى اكون قاضي السعادة

والقصيدة من الشهود

ازاي أكون ؟؟

وكوني ماعدش بيسعني

وكوني بغني إيه يعني؟!

مدام الغنوة بتسمع

بصوت ممنوع

ومهما اللحن بيدمع

ماهوش مسموع

كصوت الغربة بيسافر

مالوهش رجوع

أنا الموجوع

بقول يمكن .. وأقول جايز

لا أنا عايز

أطول الشمس بإديّا

أكون للصبح فجرية

ولا وسط الزحام ابقى

ك نسمة صيف معدية

لكن عايز ...

أكون نفسي ..

أكون بحلـم ..

أشوف حلمي ولو حتي يكون مشروط

ده بين النبض والتاني

عروق بتموت

بعلو الصوت

حاجات جوايا تتصارع

وأنا المسجون

بشوف الكون بيتفرفط

ف غيط مسكون

الاقي الطرح يتبدل

ضلام وسكوت

يموت ضي الفنار لكن

بتتشكل مواني الموت

وليه الشارع الفاضي مبيساعنيش

متستنيش .. أعود تانى

مادام الدنيا رفضاني ...

متلزمنيش

أموت

يمكن أعيش بينكم

يجوز تفتكروا أشعاري فتلزمكم

يجوز تحتاجوا أوجاعي تعلمكم

يجوز إني أعيش بينكم