إزعاج :: شعر :: هديل جسمي (رقصة طيور) - سعد النجار

هديل جسمي (رقصة طيور) - سعد النجار

وإن كات دموعك بتِنْهَج 

تنهّج خدودك معاها 

و ضحكة حبيبتك ليلاتي بتحزن 

تحزّن خلايق مدينتك ساعات 

بتخلق غوازي المدينة ف دمك 

يا صاحبي الشوارع بتنهش ف وشي 

بَلِمّ البراح اللي باقي و بمشي 

بَعَبّي الدموع اللي سجنت أبويا ف كرسي نحيف 

سمايا بتُمطر ف ليل الخريف 

أبويا اللي كسّر ضلوعي بضمة 

دموعه القزاز النحيفة بتسري 

يقِيد الشوارع بدمه الزكي 

و عالي ف وصله 

أغني يغني 

يغني أدمَّع 

فيلمح دموعي 

يغني يسكّت 

دموعي بتنطق 

و صورتك بتشهق 

تشد الجدار المغني إليها 

لوحدي هناك 

بَلِمّ المشاهد ف جيبي و اهِجّ 

بيلمع فانوس الحواري القديمة 

و يرسم بيوت الفقارى كحيلة 

عيونها بتضوي 

و تلمع سيوف البيوت الرصينة 

 

يا صاحبي الخلايق بتنشد حمام 

بتهدل قلوبهم بنات الربيع 

ولونهم وطنهم يشق الغرابة 

بيزرع ملامحه ف حسي الصريع 

هطوف البيوت اللى سقطت تجلي 

وهافرش عيوني ف وسط الشوارع 

تغني يغنوا 

يغنوا تدمع 

فتلمح دموعي 

يغنوا أموت 

حبيبتي بتنشد 

وقلبي جناح 

هَضُمِّك و اطير 

يا صاحبي الشوارع بتنهش ف وشي 

هَلِمّ البراح اللي باقي و هَمشي