إزعاج :: شعر :: ليلة المحيا - محمود البنا

ليلة المحيا - محمود البنا

ماكانش ساحر ولا .. تقدر تكون ساحرة 

الليل إله البِدَع  .. يخلق خِدَع مُــبهرة

أمَّا اللي كان في الزمان ، اللي دق البيبان  

كان الخيال الخفيف  ع " القلب  والخاصرة " / 

شئ من وِصال السحر ليل الزمان .. 

وَصْل اليمامه الزرقا خِيل الشُعَرَا  : 

لمَّا الخيال ، والسحر ، والليل يلتقوا عميان  

يسألوا النسيان ..يدلهم  ع  الذكرى  

ذكرى مرور الحب على الشريان .. 

مَرْ السحاب ع القلب فى الصحرا  !

كأن قلبَك : أبْ فى كنعان ..

بيقرا ع النسيان .. شريعة النظرة 

وقلبها : الإبن اللى فى النسيان  ..

بيفتكر كنعان .. كل ليل مرَّه

وبينهم الشُوف ، والعَمَى  سِيَّان : 

أعمى وأعمى .. والحياة مستمرة  

من أول الدنيا اللى كان يا ما كان .. 

بحرها مليان .. يا حاملَ الجَرَّه  

لمَّا الملاك الأسمر غنَّى للنُعمان  : 

يملك إيه العاشق م النياق الحمرا !  

ولمَّا كان يا ماكان فى العمر ذي البُنيان 

الورود البيضا ترياق العيون السمرا    /

شئ من وِصال البحر بر الأمان  ، 

وَصْل الأمان .. سفينة الهجرة 

كأن سحر الليلْ ،  وليل السحر يستويان 

الليل أتى بالسحر ، و السحر ( جاب اليسرى ( 

 تِنْسى لِسحر الليل ما يسمح النسيان

 ويذكُر الصبح .. ذِكر الشاعر الثورة   : 

إذ يلتقى الجمعان ..  الحق والبُهتان 

وياخد الميدان ، سيزيف بذنب الصخرة 

قولي لسحر الليل : إيه اللى خَف اللسان  ،

لمَّا خَف اللسان .. وخَفِّت النبرة !!   

وقول لسحر الليل : ما أجهلك إنسان .. 

عارف وخايف تقول : اللي سأل أدرى  / 

اللى نَطق فى الحب قبل الأوان 

شهادة الإيمان .. بالحب من نظرة  !  

ماعادش إلا الكلام على ورق سوليفان 

هو اللى يخلق زمان ..  للذكر والذاكرة   !

الصبح دق الجرس للشمس قامت تشيل .. 

من فوق كتاف الشاعرية الشعر  والشاعرة 

والشمس عين العسس على شعوب الليل .. 

والظن فى النفس يملا الدنيا والآخرة  : 

انظر عيون الأول :  شافت البستان .. 

فى الليل ! وورد النيل ..  محاوط الجوهرة    !

وانظر عيون الأولى : منتهى الإيمان .. 

بالليل ، كأن الليل / الشط و الباخرة !  

وانظر " منافي الرب " فى اليونان ..

على جبل سيزيف ، من جبل عنترة ! 

وانظر سديم الليالي و نظرة الإنسان .. 

على السديم ..فى ليالي الأُنس .. فى الصحرا !  

وانظر مع شهريار على شاه زمان  

شاه النديم فى حانة الدنيا  وليل السهره  ،

وانظر على شهرزاد مع شاه زمان 

على الحب والليل فى زمان الكوليرا ،

وقولي مين اللى يقدر يلمح الألوان 

لو الفؤاد الأعمى صاحب النظرة   !؟ 

..

ماكانش ساحر ،  

كان بيهرب من زمان الوصل ..يسأل ع الزمان 

الزمان الأصل ،  والي العمر ،  ذي البنيان 

كان بيوصف ليلةْ المحيا ،  وليل الحي   

قال :        النور مكان الضي